FAQ

Frequently Asked Questions (Mizo)


Vaihlo hi engtiang chiah a hlauhawm nge a nih?

— Vaihlo ah hian chemical 4000 aia tam a awm a, heng zing a 50 aia tam mah hian Cancer a thlen thei a ni.

Nicotine: Vaihloah hian a ngawl vei theihna tur chi khat vaihlo bawiha siamtu Nicotine a awm a. Nicotine in kan taksa a hna a thawh dan hrang hrang te chu- kan lungphu a ti rang a, thisen sang a siam a chu chuan lung hnathawh a tibuai a, thisen kal a tibuai bawk a ni.

Tar: Vaihloah hian kawng siam nan a hman (alkatra) a awm a, chu chuan chuapah bawlhhlawh a siam a thawk a ti harsa a.Tin Tar-ah hian tur hlauhawm chi hrang hrang sawmpahnih (12) aia tam Cancer thlen thei a awm a ni.

Carbon Monoxide: Vaihlo a boruak chhia (Carbon Monoxide) awm hian lungphu a ti rang a. Tin, he boruak chhia hian boruak tha (Oxygen) mihring taksa a lut tur a lo dang a, boruak tha taksa peng hrang hrang insem darh tur a ti buai thin a ni.

— Meizu mi leh bul hnai a lo awm a khu lo hip luh tur hlauhawm thenkhat te chu Nitrogen Oxides, Hydrogen Cyanide (chemical gas hlauhawm), Arsenic (sazu tur ), Carbon Monoxide (motor meikhu chhuahna atanga lo chhuak thin boruak chhia), Tar (kawng siam nana hman-Alkatara), Phenol (bathroom leh toilet tihfaina hlo), Nicotine (tur chi khat vaihlo bawiha siamtu), DDT (thosi hlo) te an ni.


Vaihlo leh vaihlo atanga thil siam chhuah avangin khawvelah thihna eng ang chiah in nge thleng?

— Khawvel pumah vaihlo leh vaihlo atanga siam kaihhnawih thil avangin kum tin mi maktaduai nga an boral ziah ang a chhut a ni. World Health Organization zirchianna a a lan danin khawvel pumah kum tinin AIDS, zu, damdawi hmansual leh accident te avanga boral aiin vaihlo leh vaihlo atanga siamchhuah thil te avanga boral an tam zawk ziah a ni. Mithiam te chhut danin hetiang zel a kan kal chho a nih chuan khawvel pumpuiah kum 2025-ah chuan in vaihlo avangin kumtin mi maktaduai sawm (10) vel boral tur a chhut a ni. Tun hnai mai a WHO in zirchiannain a tarlan danah hetiang a vaihlo hman hi a hluar zel a nih chuan kum zabi sawmhnih pakhatna chhungin vaibelchhe khat zet boral tur a rin niin kum zabi sawmhnihna chhunga vaihlo avanga boral let sawm ai mahin an tam dawn a ni.


Vaihlo avanga chhiatna thleng hi India ramah a sang chho zel ang em?

— Vaihlo hman avangin kumtin India ramah mi nuai riat atanga a nuai sawm inkar boral anga ngaih a ni. Hetiang a nih avang hian a let engemaw zat in kum 20 lo la kal turah chuan a pun rin a ni.


Thalai meizu thinah eng ang in nge chhiatna a thlen?

— Thalai meizu thin 1000 zinga a chanve zet te chu vaihlo hmanin a kaihhnawih natna (tobacco related diseases) avangin an boral ang a, chung zinga 250 te chu kum laihawl (middle age)-ah boralin, a dang 250 te chu kum upat lam deuhah an boral thung ang. Meizu mi te hi a zu lo te aiin kum 22 – 26 thleng in an nunna a tawi a ni. Tin, meizu mi thenkhat damrei deuhte pawh vaihlo kaihhnawih natna avangin an hrisel lo chho hle thin.


Midang mei zuk khu hip luh hi thihna thlentu a ni chiah em?

— WHO chhut dan chuan naupang, meizuk khu hip lut nasa te chuan thawkna lamah harsatna an tawh mai bakah an thihpui hial a ni. Puitling midang meizuk khu hip lut nasa te chu chuap natna te, lungphuchawl te leh cancer te an thihpui fo a ni.

       VAIHLO HIAN NU PUMCHHUNG A NAUTE PAWH A TI HLUM THEI!!!
       Nu naupaiin mei a zuk chuan a naupaiin a tuar nasa em em a, nauchhiat te, naute zang lutuk te a thlen thei a. Tin, an puitlin thlengin natna hrang hrang an tuar hma bik hle a ni.


Vaihlo hman kawngah hian khuahkhirhna dan a awm ve reng em?

— Kum 2003 khan vaihlo hman kawngah dan thar siam a ni a, a hmingah Cigarettes and Other Tobacco Products (Prohibition of Advertisement and Regulation of Trade and Commerce, Production, Supply and Distribution) Act, 2003 (COTPA) vuah a ni.


COTPA chuan enge a tarlan?

— COTPA in a tarlan langsar zualte chu:

  1. Puipunna reng reng a meizuk khap a ni (Section 4).

    Puipunna in a huap te chu:
    • Damdawiin
    • Zirna In: Schools, Colleges etc
    • Pisa (Offices)
    • Mipuiin zin veivahna atana kan hman (bus, maxicab etc)
    • Bus channa, Railway stations, Airport
    • Vanapa Hall, Saikuti Hall etc.
    • Thingpui dawr, Restaurants etc.
    • Hotels etc.
    • Stadium (eg. AR Ground, Ramhlun Sports Comlex, LDSC Grouind)
    • Auditorium, Open Auditorium (eg. Millenium Centre Rooftop)
    • Intihhlimna hmun (eg. City Park, District Park)
    • Bazaar (Shopping Malls eg. Millenium Centre, Solomon’s Cave).
  2. Vaihlo leh a kaihhnawih fakmawina lam chi reng reng khap a ni. (Section5)
  3. Vaihlo leh a kaihhnawih reng reng kum 18 hnuailam hnena hralh khap a ni. (Section 6)
  4. Zirna in leh a bulhnai Yard 100(300 ft) bial a vaihlo leh a kaihhnawih lam chi hralh khap a ni. (Section 6(b))
  5. Vaihlo bawmah vaihloin hriselna a khawihchhiat theih dan thu bakah a lem nen a tarlan tur a ni. (Section 7)

Meizuk bikah hian a hranpa a dan siam a awm em?

— Meizuk Khapna Dan Thar(Smoke Free Rules)hi Dt. 30th May 2008 khan chhuah tan niin , Dt. 2nd Oct 2008 a hman tan a ni.


Second Hand Smoke hi enge?

— Midang meizuk khu boruaka leng vel lo hip luh ve hi Second Hand Smoke an ti a. Environmental Tobacco Smoke (ETS), Passive Smoke emaw Involuntry Smoke emaw an ti bawk thin a ni.


Side Stream Smoke hi enge? A hlauhawm em?

— Meizial tanna hmawr atanga a khu rawn chhuak hi Side Stream Smoke a ni. He vaihlo khu hi a hlang tha (concentrated) in a hlauhawm em em a ni. Midang meizuk khu lo dawngtu hian meizial hmawr atanga a khu chhuak (side stream smoke) a lo hip luh hi zial zutuin a hip luh, a rawn thawk chhuah leh (main stream) aia a let 50 zet a nasa a Cancer thlen thei niin,tin, a let thum zet in Nicotine leh Tar a tam zawk a ni.


Eng ang chiah in nge Second Hand Smoke hian kan taksa a tihchhiat?

  • Kawppui te meizuk avangin Cancer vei leh lungphu chawl a thih thut na nasa takin a pung thei a ni.
  • Thawhah, chuap Cancer leh Sinus Cancer te a thlen.
  • Mit, hnar leh hrawk a ti za in a ti thip (irritate)

Eng ang chiah in nge meizu mi te hi meizu lo te lakah an hnawksak?

— Zirchiannaa a lan danin nitin meizial tlawn 20 zu thin bula awm chuan meizial tlawn 3-4 zu ve zel ang an ni. World Health Organization tarlan danah mi maktaduai zasarih (700 million) zet emaw khawvel pum huapa naupang 50% lai te hian midang meizuk khu an hip lut a, tin, an chenna inah a hluar zual.


Meizuk sim hian hriselna atan hlawkna enge a neih?

— Meizuk sim a hlawkna te:

  • Taksa hi darkar 24 chhungin a insiam tha tan nghal.
  • Blood Pressure (BP) minute 20 hnu-ah a pangngai.
  • Nicotine (vaihlo tur) taksa a awm ni 7-10 in karah a bo.
  • Meizuk bansan a tanga kum 2 – 3 chhungin lungphuchawl neih theihna a thla hniam.
  • Chuap Cancer vei theihna a ti hniam.
  • Thil ei tuina a ti pangai.
  • Meizuk vanga rim chhhia a bo.
  • Meizu mi khuh hreawm tak laka fihlimna.
  • Bula awm te meikhu hlauhawm tak lakah an him.

Kum 35 hma lama sim ten hriselna lamah hlawkna nasa tak an nei thei. Kan hriat tur pawimawh tak chu……Sim tur hian tlai luat a awm lo!!!!!

© Mizoram State Tobacco Control Society, Mizoram

This website belongs to the Mizoram State Tobacco Control Society, Mizoram, India. | Template by ICT

Click to start chatting.