Vaihlo hman sim i duh em

VAIHLO HMAN SIM LA, I HRISELNA VAWNGTHA LA , I SUM KHAWL RAWH


Vaihlo engtia rei nge i hman tawh tih lamah buai lo la, engtik hunah pawh simla i taksa tan emaw kawng hrang hrangin i hlawkpui dawn a ni tih ringhlel suh. He articleah hian vaihlo sim duh te mahni pawh a kawng kan dap a min kawhhmuh thei turin , sim theih dan kawng hrang hrang tarlan kan tum dawn a ni.
        A hmasa berah chuan Vaihlo ah hian enge awm hre chiang hmasa ang che. Vaihlo ah hian chemical hlauhawm tak tak 7000 chuang lai mai a awm a, chung zingah chuan cancer siam thei tu Carcinogen 70 ai tam mah a awm a ni. Chemical lar zual deuhte lo tarlang ila:
    1) Carbon Monoxide     : I taksa in boruak tha oxygen a mamawh a, mahse motor khu atanga chhuak khu dum nguk mai boruak chhia ang hi vaihlo ah a awm a ni.
    2) Ammonia        : Lei tih thatnan chemical an hman, puakthei thil leh thil tihfaina( Toilet cleaner- Harpic etc) siamna atan a hman.
    3) Formaldehyde    : Ramsa emaw nungcha thi dah thatna atana chemical chi khat.
    4) Nicotine        : A zun a min uai tirtu leh a ngawl min vei tir tu, ngaihna min siamsak thei chemical hlauhawm tak a ni.
    5) Cyanide        : Gas hlauhawm tak.
    6) Tar            : Alkatra kawng siamna atan hman thin.
    7) Arsenic        : Hlo, rannung thahna atana hman thin.

Vaihlo hian nasa takin i hriselna ah nghawng tha lo a nei thei a ni. Vaihlo hlauhawmzia leh natna hrang hrang a thlen theihte hi kan hretlangpui tawh na in tlem a zawng han thailang leh ila.Meizial tlawn khatin I nunna minute 4-20 te in a ti tawi thei a, I dam chhung tur pawh kum 5-10 laiin a ti tawi thei dawn a ni.Vaihlo Zuk leh Hmuam hian kan lu chhip atanga kan ke ler thleng hian harsatna min siam sak thei a, heng natna tihbaiawm tak tak Cancer chi hrang hrang; ka chhung, chuap, hrawk, pumpui, chawkawng te; tin, Chuap thalo, Lung thalo, Thisen zam ping avanga panchhia, Thawhhah(Asthma), TB, Inthlahchhawnnaah Pa theih lohna, Thauchhia(Cholesterol) te mai bakah hmeichhe naupai tan Nauchhiat, Naupiang hlim zanglutuk, Nuasen chhan hraitloha thithutna te leh nausen thlakim lova piang ang chite hi a thlen a ni. Tin vaihlo hman hian mihring min ti lang tar hmain thisen a heh em em a, ti a nung thei lo a, kan taksa a rimchhe bik a, tin leh ha a bal duh em em bawk a ni.A hmuam/ei chi (sahdah, tuibur, khaini) lampang hian ka chhung, hrawk , chawdawt cancer chi hrang hrang a thlen nasa bik em em a a ni. Tin  Gutkha kaihhnawih thil chi hrang hrang ei/hmuam avangin thalai naupang zawk teah natna hlauhawm tak Sub Mucous Fibrosis (ang that hleih theih loh ahnuah cancer a chang thei) natna  a thlen awlsam hle a ni. 
        Vaihlo hman simtheihna kailawn hmasa: A hnuaia tarlan te hi ngun tak in ngaihtuah rawh
    a) I vaihlo hman dan chhuikir la, i chhungten i vaihlo hman thin an hua em, hrehawm an tih em, i fate tan a him em?
    b) I hriselna nasa takin a khawih pawh tih i hria em?
    c) Vaihlo hi i thuhnuaiah i dah reng em, i duh hun hun ah sim thei ah i in ngai chiah em?
    d) Sim turin enge ka tih hmasak ber ang?
    e) Midang tanpuina i mamawh in i in hria em, i mamawh a nih chuan i mamawh ang chuan hma la ngam ang che.
    f) Sim ni tur tuk la , chu mi ni chu sawh sawn tawh suh.
        
    A chunga kan tarlan hrang hrangte i ngaihtuah fel ta maw, a hnuaia mi ang hian hma han la chhunzawm teh le:
    a) I meizial zuk thin brand han thlak chhin teh le, entirnan Will flake zu thin i nih chuan cigarette dangah.
    b) I meizial lei thin han ti tlem tan a, hei chu nakina ka zuk leh tur tiin dah that nei hauh suh.    
    c) Vaihlo i hman tam lam leh i hman zin lam ngun tak in han chhinchhiah la.I ngaihtuahna hmang zui ang che.
    d) Mei i zukin i fawh/pak zat tih tlem tum rawh.
    e) I meizial zuk a bung sei thei ang berin kal san rawh/ a tlem thei ang ber zuk tum rawh.
    f)  Mei zial i fawhin pawnlang takin fawp la, a khu i hrawk chhunga lut thla raih raih tur khawp in fawp nain emaw hip lut suh.

#A nih leh kawng hrang hrang in i bei a, i chakna a na sia engtin nge i hmachhawn tak ang le.
    a)Vaihlo hman chakna nasa uchuak tak in ti kher teh ang i neih in- vaihlo hma leh mai aiin a aiawh tur heng chewing gum , toffee, sweet hiar etc) emaw te kha han hmuam chhin la,i ka awl avanga vaihlo chakna kha a pui thei ang che.
    b) Tui a hmaa i in thin ai tam in tum tan ang che.
    c) I chak zual lai takin tui sik tlem te te a in tum ang che.
    d) Thawk lak deuh hawk emaw/nasa taka boruak thianghlim hip luh kawk kawk tum la.
    e) I ngaihtuahna tipeng thei turin thil dang ngaihtuah la, i tui zawng tak emaw thil dang tih tum talh ang che.
    f) I vaihlo hman chakna tikhawtlai thei turin, hun hlimawm tak te ngaihtuak la, number pakhat atanga za thleng emaw te han chhiar chhuak la, i kut zung tang thliak meuhin.
    g) Vaihlo hian engemaw thaho na pe ve thei che a i hriatna kha dah bo rawh, a tel lo pawn i awm thei a ni tih ringhlel suh.
    h) I hmuh theih ah ashtray, nawalh vaihlo zuk na atana hman chi hmanrua reng reng dah lang suh.

 

#A chunga kan tarlan kawng hrang hrang bakah, nangma hriatna kawng hrang hrang hmangin hma i la Vaihlo chu i sim ta ngei mai a, mahse i chakna kha a lo chhuak leh thin a, chu tak chu engtin sim hlen thei turin i hmachhawng ang.
    a) Vaihlo i hman loh avang hlawkna i chhar hrang hrangte midangte hnenah hlan chhawng rawh.
    b) Fawh khat pawh fawp chhin tawh suh.
    c) Vaihlo khu in a tih bawlhhlawh loh boruak thianghlim awmna hmunah i hun tam ber hman tum rawh.
    d) Vaihlo la hmang mek i thiante emaw chhungte emaw i hnathawh pui emaw te bulah Vaihlo an hman lai chuan awm lo ang che.
    e) Vaihlo nangmah anga lo sim ve tawh te nen pawl siamin emaw in tiphur tawn thei turin hma la rawh.
    f) I sim avangin nun khawharna emaw engemaw hrehawm tihna riau i nei thei a ni. Chumi laka i in ven nan chuan- hahdam takin awm tum la, rimawi i duh zawng tak te ngaihthla la, insawizawi nasa leh zual la, ke in kal tam la, i thiante emaw i chhungte emaw phone hmangin be tam la,mi dang te ti ti pui tam rawh 
    g) I taksa ah vaihlo i sim avanga harsatna heng luna, thak neuh neuh, rilru sawrbing theih lohna etc te hi thleng thei a ni, mangang suh ang che. Heng thil hrang hrangte awm reng tur ni lovin , vaihlo tur i taksa in a lo hriat bel tawh em em thawk leh khat a awm lo ta thut avang khan heng hi a thleng thei ang mahse rei lo te a tan chuah a ni tih hria ang che.

    h) I sim tumna i hlawhchham leh thin maw-
        i) Hrehawm ti reng reng suh, bei nawn zel ang che.
        ii)Vaihlo hman sim hlen tawh te tanpuina dawng turin inpeih rawh.
        iii) Mi thiam bikte rawn hreh lo la, an puihna i mamawh tih ringhlel suh ang che.

Vaihlo hman i sim tak avanga i taksain hlawkna tam tak a neih theih hi han ngaihtuah teh le- 
    1. Meizuk nghei hian i taksa ah nawmna a pe che in i chaw ei pawh a tui chho mai ang.
    2. Darkar 2 hnuah Nicotine (Vaihlo tur) i taksa atangin a chhuak ang.
    3. Darkar 12 hnuah Carbon Monoxide (Boruak chhia) i taksa a awm te a chhuak ang a chuap hnathawh a tha tan.
    4.Nihnih hnuah Rim hriatna a tha chho, taksa a ti hahdam in chuapah boruak tha a lut tam chho ta.
    5. Thla hnih hnuah Chuap lamin hna a thawk tha tan, thisen zam a hrisel chho
    6. Thla sawmpahnih hnuah Lung natna risk a chanve in a tlahniam
    7. Kum sawm hnuah Chuap cancer theihna risk a chanve aia hniam in meizu mek te aiin a tlahniam.
    8. Kum sawmpanga hnuah Lungphu chawl leh pangkhing zeng thut theihna risk chu vaihlo hmang ngailo te nen a inang.
        Vaihlo hman simla i hriselna in hlawkna nasa tak a neih theih bakah i sum khawl ang che. A tawp berah chuan tumruhna leh mahni inpekna tak tak a pawimawh ber a ni tih theihnghilh ngai suh ang che.
        Tanpuina i mamawh anih chuan :
    1. Civil Hospital, Aizawl Room NO 208 OPD Buildingah leh Civil Hospital, Lunglei Room No 11 ah OPD hun chhungin mithiam bikte rawn theih reng an ni.
    2. Mizoram State Tobacco Control Society, Mizoram State Cancer Institute Building, TB Tlang Zemabawk Ph 0389-2351235 ah pawh rawn theih reng an ni. 

 

© Mizoram State Tobacco Control Society, Mizoram

This website belongs to the Mizoram State Tobacco Control Society, Mizoram, India. | Template by ICT

Click to start chatting.