Release Date: 2013-11-12 18:30:00
PRESS RELEASE
Dt 13th November 2013 :
Pi Esther Lalruatkimi Secretary, Health & Family Welfare Department kaihhruainain Tuibur Factory in harsatna a thlen hrang hrangte ngaihtuahin meeting neih a ni. Meetingah hian tuibur factory awmna hrang hrangte leh lui tui mai bakah boruak thlenga harsatna a siam nasat thu ngaihthlak a ni a. A bik takin heng tuibur factory te zingah mihring khawsakna hnai taka awm ten harsatna an siam nasat zia tarlan a ni a, chungzingah chuan School naupang tamtak bakah chhungkaw engemaw zahin an tawrh thu te tarlan tel niin., sikul naupangte pawhin school kal hrehawm an tih phahna hial leh zirtirtute pawh an hrisel loh phah dan te pawh sawi zui a ni. Tuibur Factory hi hriat theih chinah Aizawl leh a chhehvelah hmun 13 awmin, heng hmun hrang hrang ITI, World Bank Road thlang, Salem leh Republic inrina leh Theihai Lui Arm Vengah te an ni.
Tuibur Factory hnaia khawsa ten thawk lamah te leh an taksaah harsatna hrang hrang an tawrh nasat zia te tarlan niin, tuibur factory atanga boruak thianghlim lo rimchhe tak chhuakin tukverh pawh hawn ngam lo khawpah a bul vela khawsa ten an tawrh thin thu pawh sawi tel a ni. Hemi anih avang hian kawng hrang hrangin heng tuibur factory te hi mihring chenna/ khawsakna atanga hla thei ang berah engtinnge sawn an nih theih ang tih ngaihtuah nghal a ni. Mizoram Pollution Control Board lamah pawh Complaint tam tak lut tawhin Tuibur Factory thenkhat te hi insawn tur pawha hriattir tawh niin Tuibur Factory te erawh an la in sawn lem lo a ni. Hemi anih vang hian ngun taka ngaihtuah a ni a, a tuibur hrim hrimin mihring hriselna a khawihchhiat bakah a thlawrna hmun Factory ten tui leh boruakah mihringte tan harsatna nasa tak an siam hi buaipui tham a lo tling chho ta a, a hmuam ve miah lo sikul naupang leh mi dang tam takin an tawrhna hi enliam mai mai theih niin committee chuan a hre lo a, chak tak a hmalak tum chhoh zel a ni. Hemi kawngah hian Committee chuan mipuite thawhpuina a ngen tak meuh meuh bawk a ni.
